Уладзімір Мікалаевіч Кірмановіч // Кобрынскі веснік. – 2002. – 20 ліпеня. – C. 2. — (Кобрына Ганаровыя грамадзяне).
Уладзімір Мікалаевіч Кірмановіч
Напэўна, як і цяперашнія хлапчукі, у дзяцінстве ён любіў бегаць улетку на Мухавец, які працякаў непадалёку ад дома. Але дзяцінства хутка скончылася, а дарослае жыццё прад’яўляла свае патрабаванні, і ў 1940 годзе Уладзіміра прызвалі ў армію. А неўзабаве пачалася вайна, вялікая і жорсткая. У час яе Кірмановіч камандаваў знішчальнай супрацьтанкавай батарэяй.
Яму давялося біць ворага ў многіх месцах: на Бранскім цэнтральным, 4-м Украінскім, 2-м Прыбалтыйскім франтах… 22 жніўня 1944 года ў час варожай атакі батарэя Кірмановіча падбіла і спаліла 16 варожых танкаў і тры самаходныя гарматы. За гэта камандзір батарэі Уладзімір Кірмановіч быў удастоены звання Героя Савецкага Саюза.
Пасля вайны Уладзімір Мікалаевіч вырашыў цалкам прысвяціць сябе службе ў арміі; ён паступае ў ваеннае авіяцыйнае вучылішча, пасля заканчэння атрымлівае званне палкоўніка. 3 1960 года выкладаў у Харкаўскім авіяцыйным вучылішчы імя С. Грыцаўца.
Горад не забыў свайго сына: на будынку СШ N2, дзе ён вучыўся, устаноўлена мемарыяльная дошка, рашэннем мясцовых улад У. М. Кірмановічу прысвоена званне Ганаровага грамадзяніна Кобрына.