Мацяш, Н. Прыгожая доля : верш / Ніна Мацяш // У прыгаршчах ветру : вершы, пераклады, эсэ / Ніна Мацяш. – Мінск, 2009. – С. 52.
Верш прысвечаны мастаку М. П. Кузьмічу.
Прыгожая доля
Рабіць добра сваё
i не лезці ў чужое.
Не пераймацца намовамі,
трымацца развагі.
Не самавялічыцца
i не прыніжацца.
Разумець мову каменя, мову агню
i даць мову эмалі.
Крыжам Лазара Богшы
самкнуць звёны часу
i трымацца ў ім сціпла.
I упарта доўжыць
у плавільні жыцця
злютоўку сэнсаў іменнасці
і мастакоўскага паклікання.
Гэта вельмі прыгожая доля,
як сам ты, зямляча!
Ніна Мацяш